مقآآبلة الزوآآج أيآآم أول!!!!!!!!

بسم الله الرحمن الرحيم
الحمدلله والصلاة والسلام على رسول الله وعلى آله
السلام عليكم ورحمة الله وبركاته




1........2........3.........اكشن.....

شخبارش؟

الحمد لله زينة... أنت ويش احوالك؟

تمام الحمد لله -

ليش ساكتة؟

مو إلى شي... أنت بعد ساكت!


المتقدم .. أنا كل اللي أتمناه مع شريكة حياتي أنّ انعيش بسعادة ومودة وسكينة ورحمة مهما كانت صعوبة العيش وما تأثر علينه الماديات، صح الماديات ساعات تخلق جو من السعادة لكن هذي مو السعادة الحقيقية اللي أتمناها مع زوجتي
والله كلامك عدل....

وأنا أوافقك عليه

المتقدم ... زين أحب أسألك شنو اتسوين في أوقات فراغش يعني تقرين شي.. اتطالعين ويش؟ يعني جذي..

الفتاة ... يعني ساعات أقرأ المجلات ساعات أطالع التلفزيون... ساعات أطلع أروح إلى صديقاتي... وبس

يعني مثل شنو هالمجلات؟

الفتاة ... ما أدري إذا تعرفهم (سيدتي) و(زهرة الخليج)... ومال الأزياء... يعني هذي أشياء خاصة فينّه احنه البنات... لا تشغل بالك

المتقدم ... زين أنتين عندك اهتمامات بالفعاليات الثقافية اللي ايسوونها إلى البنات؟

الفتاة ...ايه أني كله أروح مع صديقاتي مركز المعارض إذا في معرض واحنه دائماً انروح الصباحي لأنه خاص بالنساء...

المتقدم ... لا ما أقصد ليش مركز المعارض... أقصد الندوات والاحتفالات والمحاضرات... يعني جذي...

الفتاة ... أكيد أروح الاحتفالات بس الندوات والمحاضرات ما أروح واجد...

المتقدم ... زين انتين عندك اهتمامات وميول بالجمعيات السياسية والثقافية اللي طلعت هالأيام، يعني مثلاً تشتركين فيها؟

الفتاة ... بصراحة أسئلتك غريبة ويش دخل هذا في الزواج... لكن يا أخي أني ما عندي ميول صراحة أدخل هالجمعيات...

زين ألحين أني باسألك ...

ايه اتفضلي ...

أنت تشتغل؟

ايه


كم معاشك؟

المتقدم ... 2000 ريال ... بس اتصدقين ما أدري شلون أحس انها تكفيني... ويبي لي واحد علشان أعطيه منها بعد...

الفتاة ... زين ما علينه، وعندك سيارة؟

ايه

موديل كم؟

مممممم انتين موديل كم؟


أني ما عندي سيارة ...

لا انا ما أقصد سيارة أقصد يعني انتين مواليد كم؟

إني مواليد سنة 1980....

المتقدم ... يا سلام!... صدفة حلوة اتصدقين أنا بعد سيارتي مواليد سنة ثمانين، أقصد موديل...، بس أنا في الخط السريع أطوف سيارات واجد حتى اللكسس شبح وغيرهم....

زين وعندك شقة جاهزة علشان الزواج؟

المتقدم ... والله حالياً... صراحة ما عندي بس سويت غرفة وحمام خاصة فيني علشان الخطوبة وبداية أيام الزواج، وبعدين إنشاء الله أبني لينّه شقة وإذا الله عطاني الخير أبني بيت وحتى قصر...

بصراحة...

ايه قولي لا تستحين منّي... قولي..

بصراحة طحت من عيوني...

ليش؟!

الفتاة ... عجل... معاشك 2000 ريال ، وسيارة قديمة، وشقة ما عندك....

عجل أنا بعد بقول ليش بصراحة...

ويش؟

المتقدم ... طيّح الله حظـّش وحظ اللي بياخدش.... يالله قومي خليني أطلع...


------------- تمّت المقابلة على خير ------------